ஊடகம் பொதுசன ஊடகமாக பரிணமித்து சகல துறைகளிலும் ஊடறுத்து கணணி யுகத்தில் தனது செல்வாக்கை மேலும் வலுப்படுத்திக் கொண்டிருக்கும் இன்றைய சூழலில் குறிப்பிடத்தக்கதொரு இலத்திரனியல் ஊடகமாக விளங்கும் தொலைக்காட்சியின் தோற்றமும் வளர்ச்சியும் பற்றி அறிந்து கொள்ளவேண்டியது கட்டாயமானதாகும். அந்தவகையில் அது குறித்த அறிமுகத்தையே இங்கு தருகிறேன்.
தொலைக்காட்சி ஒளிபரப்புச் சேவைக்கான காட்சிகளை அல்லது படங்களை (Visuals) ஓரிடத்திலுருந்து இன்னோர் இடத்திற்கு காற்றின் ஊடாக அனுப்ப முடியும் என்ற தத்துவத்தை 1883ம் ஆண்டு ஜேர்மனிய மாணவனான போல் நிப்கொப் (Paul nipkow) வெளியிட்டார். ஜோன் லொகிபேர்ட் (John logiebird) என்பவர் 1928ம் ஆண்டு இங்கிலாந்தில் BBC யின் (British Broadcasting Corporation)மத்திய அலைவரிசையைப் பயன்படுத்தி உலகின் முதலாவது கறுப்பு வெள்ளைத் தொலைக்காட்சிச் சேவையை ஆரம்பித்திருந்தார்.
1936ல் BBC நிலையம் தினசரி நிகழ்ச்சிகளை ஒளிபரப்ப ஆரம்பித்தது. NTSC என்ற வர்ணத் தொலைக்காட்சி 1954ல் அமெரிக்காவில் ஆரம்பித்து வைக்கப்பட்டது. இதுவே உலகின் முதலாவது வர்ணத்தொலைக்காட்சி ஒளிபரப்புச் சேவையாகும். அதனைத் தொடர்ந்து 1970களில் உலகின் பல நாடுகளிலும் தொலைக்காட்சி அறிமுகம் செய்து வைக்கப்பட்டது.
உலக நாடுகள் பலவற்றிலும் தற்போது கம்பியில்லா தொலைக்காட்சிச் சேவை, ‘கேபிள்’ தொலைக்காட்சிச் சேவை, செய்மதி தொலைக்காட்சி மீள் ஒளிபரப்புச் சேவை என பலவகையான ஒளிபரப்புச் சேவைகள் நடாத்தப்பட்டு வருகின்றன. அவற்றில் ஒளிபரப்புக்குத் தேவையான ‘அன்ரெனா’க்களை (Antenna) பொருத்தி ஒளிபரப்புச் செய்வது ஒருவகையாகும். இன்னொரு முறையான செய்மதிகள் (Satellite) மூலமும் ஒளிபரப்புச் சேவைகள் நடாத்தப்பட்டு வருகின்றன.
தொலைக்காட்சிச் சேவைகள் நவீன முறைகளில் அபிவிருத்தியடைந்து காணப்படுவதால் இந்த ஊடகம் முக்கியமான வளர்ச்சிக் கட்டத்தை அடைந்துள்ளது. தற்போது ‘இன்ரநெற்’ (Internet) மூலம் தகவல் பரிமாற்றமும், செய்மதிகள் ஊடாக மகாநாடுகளும் நடைபெறுவதால் தகவல் தொடர்பு ஊடகம் ஒரு வளர்ச்சியடைந்த நிலையை எய்தியுள்ளது.
அண்மைக் காலங்களில் தொலை பேசியில் பேசுபவரைக் கூட நேரடியாகப் பார்த்துப் பேசக் கூடிய வகையில் தொழில் நுட்ப சேவைகள் வளர்ச்சியடைந்துள்ளன. தொலைக்காட்சியில் நிகழ்ச்சிகளை தெரிவு செய்து பார்க்கக் கூடியதாகவும் தொலைக்காட்சிச் சேவைகள் அமைந்துள்ளன. நாம் பார்க்கும் நகழ்ச்சிகளில் எமது உருவத்தைப் புகுத்தி அந்த நிகழ்ச்சியைத் தொலைக்காட்சியில் பார்க்கக் கூடியதாகவும் நவீன ‘இன்ரக்ரிவ் ரி.வி.’ (Interactive T.V.) முறைகள் அமைந்துள்ளன.
இவையெல்லாம் ‘கம்பியுஸ்ரீட்டரின்’ (Computer) அறிமுகத்தால் தொலைக் காட்சியில் ஏற்பட்டுள்ள வியத்தகு அபிவிருத்திகளாகும். ஜப்பான், அமெரிக்கா போன்ற நாடுகளில் உள்ள தொழில்நுட்ப நிறுவனங்கள் ஒன்றிணைந்து இதுபோன்ற நவீன உபகரணங்களை தயாரித்து விநியோகித்து வருகின்றன. இந்த நவீன தொழில் நுட்பங்களினால் தொலைக் காட்சிக்கும் மனிதர்களுக்கும் இடையிலான தொடர்பு மிகவும் நெருங்கி விட்டது.
தொலைக்காட்சி நிகழ்ச்சிகள், புதிய சினிமா படங்கள், ‘வீடியோ’ காட்சிகள் வரை அனைத்தையுமே இல்லங்களில் உள்ள கணணிகளில் காணக்கூடிய நாளும் நெருங்கிக் கொண்டிருக்கிறது. அவற்றினை இணையத்தினூடாக பார்க்கக்கூடிய ஆரம்ப முயற்சிகளை செய்வதில் சர்வதேச புகழ் வாய்ந்த ‘வெப்சைட்’ நிறுவனங்களாகிய ‘யாகூ’, ‘ஏ.ஓ.எல்.’, ‘மைக்ரோ சொப்ட்’, ‘கூகுள்’ ஆகிய நிறுவனங்கள் தீவிரமாக இறங்கியுள்ளன.
அமெரிக்கா, ஜப்பான் போன்ற வளர்ச்சியடைந்த நாடுகளில் 65க்கும் மேற்பட்ட அலைவரிசைகளில் தொலைக்காட்சிச் சேவைகள் நடைபெறுகின்றன. அமெரிக்காவில் மட்டும் ‘கேபிள்’ தொலைக்காட்சிச் சேவைகளோடு சேர்த்து 500க்கும் மேற்பட்ட தொலைக்காட்சிச் சேவைகள் நடைபெறுவதாக அறிக்கைகள் தெரிவிக்கின்றன.
தொலைக்காட்சி ஒளிபரப்பின் போது, பொருள்களின் உருவங்களும் படங்களும் நிகழ்ச்சியின் படங்களும் உருவங்களும் ஒளிபரப்பப்படும் அதே சமயத்தில் ஒலியும் ஒலிபரப்பப்பட வேண்டும். ஆகவே, படங்களும் உருவங்களும் மின்னலைகளாக மாற்றப்படுகின்ற அதே சமயத்தில் ஒலி அலைகளும் மின்னலைகளாக மாற்றப்பட்டு இவை இரண்டுமே ஒரே அன்ரெனா (Antenna) வழியாக ஒளி – ஒலிபரப்பப்பட்டு தாங்கி அலைகள் மூலம் சுமந்து செல்லப்பட்டு ஏற்குமிடத்தில் வான் கம்பிகளில் மோதி மீண்டும் ஒளியாகவும் ஒலியாகவும் தொலைக்காட்சிப் பெட்டிகளில் மாற்றப்பட்டு தொலைக்காட்சித் திரையில் காட்சிகளையும் அவற்றிற்குரிய ஒலிகளையும் தருகின்றது.
அதனால் தொலைக்காட்சி எனும் வெகுஜன ஊடகம் மனித தேடல்களில் ஆதாரமாக அமையும் குரலொலி (Voice), தரவுகள்(Data), ஒளியுரு (Video) ஆகிய மூன்று முக்கியமான தொடர்பு முறைகளைக் கைக்கொண்டு கட்புல (ஒளி) செவிப்புல (ஒலி) சாதனமாக செயற்பட்டு சமூகத்தில் அதிக தாக்கத்தினை ஏற்படுத்திவருகின்றது.
எஸ். மோசேஸ்.
